សិល្បករជើងចាស់ពីររូបបានទទួលពានរង្វាន់ពីកម្មវិធី Legend Awards 2026

 សិល្បករជើងចាស់ពីររូបបានទទួលពានរង្វាន់តួសម្ដែងឆ្នើម និងពានរង្វាន់កិត្តិយសក្នុងកម្មវិធី Legend Awards 2026 ដែលការប្រគល់ពានរង្វាន់នេះផ្តោតទៅលើការសម្ដែងល្អឥតខ្ចោះ ទាក់ទាញចិត្តទស្សនិកជន ព្រមទាំងការកោតសរសើរចំពោះការលះបង់ស្នាដៃដ៏មានតម្លៃ និងការជំរុញ និងអភិវឌ្ឍវិស័យភាពយន្តនៅកម្ពុជា។

សិល្បករជើងចាស់តាំងពីសម័យសង្គមរាស្ត្រនិយមលោកស្រី ឌី សាវ៉េត បានទទួលពានរង្វាន់កិត្តិយសពីកម្មវិធី Legend Awards 2026។ ការប្រគល់រង្វាន់ជូនលោកស្រី គឺដើម្បីជាការកោតសរសើរ និងទទួលស្គាល់ចំពោះការលះបង់ ស្នាដៃដ៏មានតម្លៃ និងការរួមចំណែកយ៉ាងសំខាន់ ក្នុងការជំរុញ និងអភិវឌ្ឍវិស័យភាពយន្តនៅកម្ពុជា។

សិល្បកជើងចាស់មួយរូបទៀតគឺលោក ទេព រិនដារ៉ូ បានឈ្នះពានរង្វាន់តួសម្ដែងបុរសឆ្នើមពីកម្មវិធី Legend Awards 2026។ ការទទួលបានពានរង្វាន់នេះគឺកើតចេញពីការសម្ដែងដ៏ល្អឥតខ្ចោះ មានភាពទាក់ទាញចិត្តទស្សនិកជន និងបានបង្ហាញទេពកោសល្យដ៏អស្ចារ្យក្នុងរឿង«ចាស់កំព្រា»។ ជាមួយគ្នានេះដែរ រឿងចាស់កំព្រា ដែលលោកសម្ដែងក៏បានឈ្នះពានរង្វាន់ភាពយន្តឆ្នើម (Best Feature Film) និងឈ្នះពានរង្វាន់ អត្ថបទភាពយន្តឆ្នើម (Best Script)ក្នុងកម្មវិធី Legend Awards 2026 ផងដែរ។

បន្ថែមពីនេះ ភាពយន្តចាស់កំព្រាក៏ជាប់ជាភាពយន្តខ្មែរដែលរកចំណូលបានច្រើនជាងគេ ក្នុងចំណោមភាពយន្តខ្មែរចំនួនបី។ ភាពយន្តពីរទៀតគឺភូមិគ្រឹះអាគម និងគូស្នេហ៍កំបុតក្បាល។

ក្រៅពីសិល្បករជើងចាស់ទាំងពីររូប នៅមានសិល្បករវ័យក្មេងមួយចំនួនទៀតឈ្នះពានរង្វាន់ពីកម្មវិធី Legend Awards 2026 ។ សិល្បករទាំងនោះរួមមានកញ្ញា សុន ទេពបំណង សម្ដែងក្នងរឿង សែនឆ្ងាយក្បែរអ្នក បានឈ្នះពានរង្វាន់តួសម្តែងនារីជំនាន់ថ្មីឆ្នើម។ លោក ប៊ុន សំខាន់ សម្ដែងរឿង សែនឆ្ងាយក្បែរអ្នក ដូចគ្នាក៏បានឈ្នះពានរង្វាន់ តួសម្តែងបុរសជំនាន់ថ្មីឆ្នើម។ ចំណែកកញ្ញា វ៉ាន់ សម្ផស្ស សម្ដែងរឿង កូននេនម្តាយខ្មោច បានឈ្នះពានរង្វាន់ តួសម្តែងនារីឆ្នើម។

គួររំឭកថាកាលពីយប់ថ្ងៃទី១១ ខែកក្កដា ឆ្នាំ២០២៦ រោងភាពយន្តលេជេន (Legend Cinema) បានរៀបចំកម្មវិធីខួប១៥ឆ្នាំរបស់ខ្លួននៅកម្ពុជា និងបានរៀបចំឲ្យមានការប្រគល់ពានរង្វាន់ដល់សិល្បករឆ្នើមសម្ដែងភាពយន្តខ្មែរផងដែរ។៕

ដោយ៖ តារា

(សូមអានបន្ត)

កម្មវិធី «The 2% Season 2 Finale Live Podcast» បញ្ចប់ដោយភាពជោគជ័យយ៉ាងគគ្រឹកគគ្រេង!

 កម្មវិធីផតខាសដ៏ពេញនិយមបំផុត «The 2%» បានបិទបញ្ចប់រដូវកាលទី២ របស់ខ្លួនយ៉ាងជោគជ័យ និងអស្ចារ្យបំផុត តាមរយៈការផ្សាយផ្ទាល់ (Live Podcast) ក្រោមភាពជាដៃគូជាមួយ EXPREZ កាលពីថ្ងៃទី០៦ ខែសីហា ឆ្នាំ២០២៦ ម្សិលមិញនេះ នៅរោងភាពយន្ត Legend by IZE (ផ្សារទំនើប ជីប ម៉ុង ២៧១ មេហ្គាម៉ល) ដោយមានការចូលរួមយ៉ាងកុះករពីសំណាក់ទស្សនិកជន។

នៅក្នុងរាត្រីដ៏ពិសេសនៃវគ្គផ្តាច់ព្រ័ត្រនេះ លោក តេង ស៊ាវប៉ោ (Mr. Teng Seavpor) ដែលជាពិធីករ និងជាស្ថាបនិកកម្មវិធី បានទទួលស្វាគមន៍វត្តមានវាគ្មិនកិត្តិយសដ៏ខ្ពង់ខ្ពស់គឺ អ្នកឧកញ៉ា លាង ពៅ (Peter) ដែលជាថ្នាក់ដឹកនាំអាជីវកម្មដ៏លេចធ្លោ និងជោគជ័យមួយរូបនៅកម្ពុជា។

េញមួយកម្មវិធី ទស្សនិកជនទទួលបាននូវចំណេះដឹង បទពិសោធន៍ជីវិតពិត យុទ្ធសាស្ត្រធុរកិច្ច និងការបំផុសគំនិតយ៉ាងស៊ីជម្រៅពីអ្នកឧកញ៉ា ក្នុងការកសាងអាណាចក្រអាជីវកម្មឱ្យរឹងមាំ ដែលរកជាវនៅកន្លែងណាផ្សេងមិនបាន។ បរិយាកាសនៅក្នុងរោងភាពយន្តទាំងមូល ពោរពេញទៅដោយភាពរំភើប រីករាយ និងការទះដៃអបអរសាទរមិនដាច់ពីសំណាក់អ្នកចូលរួមទាំងអស់។

ភាពជោគជ័យនៃកម្មវិធីដ៏អស្ចារ្យនេះ ក៏មានការចូលរួមគាំទ្រយ៉ាងធំធេងពីបណ្តាដៃគូសហការ និងអ្នកឧបត្ថម្ភធំៗ រួមមាន៖ EXPREZ, Legend Cinema, IZE, BLVNC Attire, និង Leng Kheang។

កម្មវិធី «The 2%» បានបង្ហាញយ៉ាងច្បាស់ពីការប្តេជ្ញាចិត្តក្នុងការនាំមកនូវមាតិកាអប់រំ និងការចែករំលែកផ្នត់គំនិតវិជ្ជមានដើម្បីអភិវឌ្ឍសង្គម។

អ្វីដែលរឹតតែពិសេស និងជាកាដូដ៏ភ្ញាក់ផ្អើលសម្រាប់អ្នកគាំទ្រនោះគឺ កម្មវិធី « The 2% រដូវកាលទី៣ (Season 3)» នឹងលេចរូបរាងឡើងក្នុងពេលឆាប់ៗខាងមុខនេះហើយ! ក្រោមការបន្តគាំទ្រ និងឧបត្ថម្ភធំដដែលពី Cambodia Cola ដែលជាដៃគូដ៏រឹងមាំ ក្នុងការជំរុញ និងលើកកម្ពស់ការចែករំលែកចំណេះដឹង និងផ្នត់គំនិតអាជីវកម្មឱ្យកាន់តែទូលំទូលាយ និងកាន់តែអស្ចារ្យជាងរដូវកាលមុនៗ។

(សូមអានបន្ត)

PINEX AGRO នាំ​ស្វាយចន្ទី​កម្ពុជា​ឡើង​ឆាក​អន្តរជាតិ​​ក្នុង​កម្មវិធី​ IMPACT GALLERIA TOKYO 2026

 

លោកស្រី ពិន ភិរម្យ អគ្គនាយិកានៃក្រុមហ៊ុន UNI Holding និងជានាយិកាប្រតិបត្តិនៃក្រុមហ៊ុន PINEX AGRO Co., Ltd. បាននាំយកសក្តានុពលវិស័យស្វាយចន្ទីកម្ពុជា ទៅបង្ហាញលើឆាកអន្តរជាតិ បន្ទាប់ពីត្រូវបានជ្រើសរើសជា បេក្ខភាព Top 10 នៃពានរង្វាន់ IMPACT GALLERIA AWARD 2026 និងបានតំណាងឱ្យកម្ពុជាចូលរួមកម្មវិធី IMPACT GALLERIA TOKYO 2026 នៅទីក្រុងតូក្យូ ប្រទេសជប៉ុន។

នៅថ្ងៃទី ១ ខែសីហា ឆ្នាំ២០២៦ លោកស្រីបានធ្វើបទបង្ហាញអំពីគំរូអាជីវកម្ម ចក្ខុវិស័យរបស់ PINEX AGRO និងសក្តានុពលដ៏ធំធេងនៃ វិស័យស្វាយចន្ទីកម្ពុជា ទៅកាន់វិនិយោគិន ដៃគូអាជីវកម្ម និងថ្នាក់ដឹកនាំសហគមន៍ ធុរកិច្ចអន្តរជាតិ។

ស្វែងយល់ពីឱកាសនៃវិស័យស្វាយចន្ទីកម្ពុជា

សារសំខាន់ដែល PINEX AGRO ចង់បង្ហាញទៅកាន់ពិភពលោក គឺកម្ពុជាមិនត្រឹមតែមានសក្តានុពលក្នុងការ ផលិតវត្ថុធាតុដើមកសិកម្មប៉ុណ្ណោះទេ ប៉ុន្តែមានឱកាសដ៏ធំក្នុងការបង្កើត តម្លៃបន្ថែមតាមរយៈការកែច្នៃ បច្ចេកវិទ្យា សុវត្ថិភាពចំណីអាហារ ការវេចខ្ចប់ ការកសាងម៉ាកយីហោ និងការនាំផលិតផលសម្រេចទៅកាន់ទីផ្សារអន្តរជាតិ។ តាមរយៈវេទិកាអន្តរជាតិនេះ PINEX AGRO ក៏មានគោលបំណងទាក់ទាញចំណាប់អារម្មណ៍ពី វិនិយោគិន ដៃគូយុទ្ធសាស្ត្រ អ្នកផ្តល់បច្ចេកវិទ្យា និងដៃគូចែកចាយអន្តរជាតិ ឱ្យងាកមកស្វែងយល់ពីឱកាសក្នុងវិស័យស្វាយចន្ទី និងកសិ-ឧស្សាហកម្មរបស់កម្ពុជា។

បន្ទាប់ពីការចូលរួមនៅទីក្រុងតូក្យូ លោកស្រី ពិន ភិរម្យ ក៏ទទួលបាន ការទទួលស្គាល់បន្ថែម និងឱកាសចូលរួមតាំងពិព័រណ៍នៅ Sustainable Food Museum ដែលជាឱកាសថ្មីមួយទៀតក្នុងការនាំយកផលិតផល និងរឿងរ៉ាវនៃវិស័យកសិកម្មកម្ពុជាទៅកាន់ទស្សនិកជនអន្តរជាតិ។

មោទនភាពមួយទៀតសម្រាប់កម្ពុជា

សម្រាប់ PINEX AGRO សមិទ្ធផលនេះមិនមែនជាជោគជ័យរបស់ក្រុមហ៊ុនតែមួយនោះទេ ប៉ុន្តែជាឱកាសមួយក្នុងការនាំយក កម្ពុជា គ្រាប់ស្វាយចន្ទីកម្ពុជា និងសហគ្រិនខ្មែរ ទៅបង្ហាញលើឆាកអន្តរជាតិ។

PINEX AGRO បន្តប្តេជ្ញាចូលរួមជំរុញការកែច្នៃផលិតផលក្នុងស្រុក បង្កើតតម្លៃបន្ថែម គាំទ្រកសិករ បង្កើតការងារក្នុងសហគមន៍ និងនាំយកផលិតផលកសិកម្មដែលផលិត និងកែច្នៃដោយកូនខ្មែរ ឆ្ពោះទៅកាន់ទីផ្សារតំបន់ និងពិភពលោក។

        ពីដីកម្ពុជា ឆ្ពោះទៅកាន់ឆាកពិភពលោក

        ស្វែងយល់ពីស្វាយចន្ទីកម្ពុជា — ស្វែងយល់ពីឱកាសវិនិយោគនៅកម្ពុជា

    អំពី PINEX AGRO

PINEX AGRO Co., Ltd. ជាក្រុមហ៊ុនកសិ-ឧស្សាហកម្មកម្ពុជា ដែលផ្តោតលើការបង្កើតតម្លៃបន្ថែមដល់ផលិតផលកសិកម្ម ជាពិសេសវិស័យស្វាយចន្ទីកម្ពុជា។ ក្រុមហ៊ុនមានចក្ខុវិស័យក្នុងការផ្សារភ្ជាប់វិស័យកសិកម្ម ការកែច្នៃ ឧស្សាហកម្ម និងសហគមន៍ ដើម្បីនាំយកផលិតផលកម្ពុជាដែលមានគុណភាពទៅកាន់ទីផ្សារតំបន់ និងអន្តរជាតិ។

(សូមអានបន្ត)

សម្តេចធិបតី ហ៊ុន ម៉ាណែត៖ ថ្ងៃនេះរាជរដ្ឋាភិបាលកម្ពុជាបានសម្រេច នឹងប្រើប្រាស់យន្តការនៃការផ្សះផ្សារដោយចាប់បង្ខំ ដែលស្ថិតនៅក្រោមអនុសញ្ញាអង្គការសហប្រជាជាតិ ស្តីពីនីតិសមុទ្រ (UNCLOS)

 

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានគូសបញ្ជាក់តាមបណ្តាញសង្គមការងារផ្លូវការ នាថ្ងៃទី៥ ខែឧសភា ឆ្នាំ២០២៦នេះថា ថ្ងៃនេះរាជរដ្ឋាភិបាលកម្ពុជាបានសម្រេច នឹងប្រើប្រាស់យន្តការនៃការផ្សះផ្សារដោយចាប់បង្ខំ រឺមួយក៏យើងអាចហៅថា (Compulsory Conciliation) (ខមផាលសូរី ខនស៊ីលីហ្សិន) ដែលស្ថិតនៅក្រោមអនុសញ្ញាអង្គការសហប្រជាជាតិ ស្តីពីនីតិសមុទ្រ (UNCLOS) (អាន់ខ្លូស) ដើម្បីស្វែងរកដំណោះស្រាយដោយសន្តិវិធី ផ្អែកលើមូលដ្ឋានច្បាប់ ក្នុងការដោះស្រាយតំបន់ទាមទារដែនសមុទ្រត្រួតគ្នារវាងកម្ពុជានិងថៃ បន្ទាប់ពីភាគីថៃបានប្រកាសជាផ្លូវការ សម្រេចដកខ្លួនដោយឯកតោភាគីចេញពីអនុស្សរណៈនៃការយោគយល់គ្នារវាងកម្ពុជា-ថៃ រឺហៅកាត់ថា MOU 2001 (ឬដែលភាគីថៃហៅថា MOU44) ។

សម្តេចបានបន្តថា ជាង25ឆ្នាំកន្លងមកនេះ អនុស្សរណៈនៃការយោគយល់គ្នារវាងកម្ពុជា-ថៃ MOU2001 បានដើរតួនាទីយ៉ាងសំខាន់ ដែលជាក្របខណ្ឌទ្វេរភាគីតែមួយគត់ដែលបានឯកភាពគ្នា សម្រាប់ភាគីទាំងពីរក្នុងការដោះស្រាយតំបន់ទាមទារដែនសមុទ្រត្រួតគ្នា ហើយការចូលជាធរមាននៃអនុស្សរណៈនៃការយោគយល់គ្នានេះ បញ្ជាក់អោយឃើញអំពីស្មារតីនៃកិច្ចសហប្រតិបត្តិការ និងសុច្ឆន្ទៈទៅវិញទៅមក។ តាមសម្តេចធិបតី បានបញ្ជាក់ថាជាការសោកស្តាយ ដែលភាគីថៃបានសម្រេចដកខ្លួនជាឯកតោភាគីចេញពីអនុស្សរណៈនៃការយោគយល់គ្នាមួយនេះ ហើយសម្រាប់កម្ពុជាយើងតែងតែផ្តល់លទ្ធភាពទៅដល់យន្តការទ្វេភាគី ដែលស្របទៅនឹងតាមអនុស្សរណៈនៃការយោគយល់គ្នាមួយនេះ។ ការដកខ្លួន ដោយឯកតោភាគីចេញពីអនុស្សរណៈនៃការយោគយល់គ្នានេះ គឺជាការបោះបង់ចោលកិច្ចព្រមព្រៀងទ្វេរភាគីតែមួយគត់ ដែលបង្កើតអោយមានក្របខណ្ឌទ្វេរភាគីតែមួយគត់ ដែលភាគីទាំងពីរបានពឹងផ្អែក និងប្រើប្រាស់ជាង ២ទស្សវត្សន៍កន្លងមកនេះ។

សម្តេចធិបតី នាយករដ្ឋមន្ត្រី បានបន្ថែមថាក្នុងករណីនេះ ក្នុងនាមជារដ្ឋដែលគោរព និងប្រកាន់ខ្ជាប់ច្បាប់អន្តរជាតិ ក៏ដូចជាការដោះស្រាយជម្លោះដោយសន្តិវិធី កម្ពុជាពុំមានជម្រើសអ្វីក្រៅពីពឹងផ្អែកទៅលើច្បាប់អន្តរជាតិ និងអនុសញ្ញាអង្គការសហប្រជាជាតិ ស្តីពីនីតិសមុទ្រ ជាពិសេសយន្តការនៃការផ្សះផ្សារដោយចាប់បង្ខំ (Compulsory Conciliation) (ខមផាលសូរី ខនស៊ីលីហ្សិន) ដែលបង្កើតឡើងក្រោមអនុសញ្ញាមួយនេះនុះទេ។

(សូមអានបន្ត)

ឧកញ៉ាវេជ្ជបណ្ឌិត Pung Carolyne ត្រូវបានអញ្ជើញទៅចូលរួមកិច្ចប្រជុំកំពូល ពាណិជ្ជកម្ម «Choose France» ទីក្រុង ប៉ារីស នៅឯវិមាន Versailles

 ភ្នំពេញ)៖ ឧកញ៉ាវេជ្ជបណ្ឌិត Pung Carolyne អនុប្រធានក្រុមប្រឹក្សាភិបាលក្រុមហ៊ុនកាណាឌីយ៉ា គ្រុប (Canadia Group) សហគ្រិន និងជាវេជ្ជបណ្ឌិត មានកិត្តិយសដែលត្រូវបានអញ្ជើញឱ្យចូលរួមក្នុងកិច្ចប្រជុំកំពូលពាណិជ្ជកម្មសកល «Choose France» ដែលបានប្រារព្ធឡើងនៅវិមាន Versailles នៅថ្ងៃទី១ ខែមិថុនា ឆ្នាំ២០២៦។ លោកស្រីត្រូវបានអមដំណើរដោយលោក Vincent Kou អនុប្រធានប្រតិបត្តិនៃក្រុមហ៊ុន អូស៊ីអាយស៊ី (OCIC)។

ក្នុងអំឡុងពេលនៃដំណើរទស្សនកិច្ចទៅកាន់ប្រទេសបារាំង ឧកញ៉ាវេជ្ជបណ្ឌិត Pung Carolyne ក៏មានឱកាសជួបជាមួយប្រធានាធិបតីបារាំង Emmanuel Macron នៅវិមាន Élysée និងផ្លាស់ប្តូរទស្សនៈជាមួយថ្នាក់ដឹកនាំអាជីវកម្ម និងស្ថាប័នអន្តរជាតិ។​

កម្មវិធី «Choose France» ដែលបង្កើតឡើងដោយប្រធានាធិបតី Emmanuel Macron ក្នុងឆ្នាំ២០១៨ បានប្រមូលផ្តុំវិនិយោគិនអន្តរជាតិឈានមុខ នាយកប្រតិបត្តិអាជីវកម្ម និងដឹកនាំធុរកិច្ច ដើម្បីពិភាក្សាអំពីការវិនិយោគ នវានុវត្តន៍ និងកិច្ចសហប្រតិបត្តិការសកល។ កម្មវិធីប្រចាំឆ្នាំនេះបានប្រមូលផ្តុំបុគ្គលសំខាន់ៗជាច្រើន ពីសហគមន៍ធុរកិច្ចអន្តរជាតិ រួមមាន Xavier Niel ស្ថាបនិក Iliad; Chia Song Hwee នាយកប្រតិបត្តិក្រុមហ៊ុន Temasek និង Masayoshi Son នាយកប្រតិបត្តិក្រុមហ៊ុន SoftBank ដែលបានប្រកាសពីការវិនិយោគចំនួន ៧៥ពាន់លានអឺរ៉ូ នៅប្រទេសបារាំង រួមជាមួយថ្នាក់ដឹកនាំមកពីក្រុមហ៊ុនដែលមានទីតាំងនៅច្រើនប្រទេស មូលនិធិវិនិយោគរបស់រដ្ឋ និងក្រុមហ៊ុនធំៗទូទាំងពិភពលោក។

ក្នុងនាមជាអនុប្រធានក្រុមប្រឹក្សាភិបាលក្រុមហ៊ុន Canadia Group ដែលមានផ្នែកហិរញ្ញវត្ថុរបស់ខ្លួនក្រោមក្រុមហ៊ុន កាណាឌីយ៉ា អ៊ីនវេសមិន ហូលឌីង ភីអិលស៊ី (CIH) និងក្រុមហ៊ុនពហុវិស័យរបស់ខ្លួនក្រោមក្រុមហ៊ុន អូស៊ីអាយស៊ី (OCIC) ឧកញ៉ាវេជ្ជបណ្ឌិត Pung Carolyne ចូលរួមចំណែកដល់ការអភិវឌ្ឍជាបន្តបន្ទាប់របស់ ក្រុមហ៊ុននៅទូទាំងវិស័យសំខាន់ៗនៃសេដ្ឋកិច្ចកម្ពុជា។

លោកស្រីបានដើរតួនាទីយ៉ាងសំខាន់ក្នុងការជំរុញការអប់រំភាសាបារាំងនៅកម្ពុជា ក្នុងនាមជាស្ថាបនិកនៃ សាលាអន្តរជាតិ បារាំង ភ្នំពេញ (École Française Internationale) និង សាកលវិទ្យាល័យ Université Francophone d’Asie (UFA)។ ក្រៅពីវិស័យអប់រំ លោកស្រី បានរួមចំណែកក្នុងការពង្រឹងទំនាក់ទំនងជាមួយស្ថាប័ន និងធុរកិច្ចបារាំង។

OCIC ក៏បានធ្វើការយ៉ាងជិតស្និទ្ធជាមួយស្ថានទូតបារាំងប្រចាំនៅកម្ពុជាផងដែរ ក៏ដូចជាវិទ្យាស្ថានបារាំងនៅកម្ពុជា (Institut Français du Cambodge) អស់រយៈពេលជាងបីឆ្នាំ ដែលឆ្លុះបញ្ចាំងពីការគាំទ្រជាបន្តបន្ទាប់របស់ក្រុមហ៊ុនចំពោះ ហ្រ្វង់កូហ្វូនី (La Francophonie) និងគំនិតផ្តួចផ្តើមវប្បធម៌បារាំងនៅកម្ពុជា។

ការចូលរួមនេះ ក៏កើតឡើងនៅពេលដែលប្រទេសកម្ពុជាកំពុងរៀបចំយ៉ាងសកម្មសម្រាប់កិច្ចប្រជុំកំពូល ហ្រ្វង់កូហ្វូនី (Francophonie) លើកទី២០ ដែលនឹងមកដល់នៅទីក្រុងភ្នំពេញនៅខែវិច្ឆិកានេះ ដែលជាការជួបជុំអន្តរជាតិដ៏សំខាន់មួយដែលត្រូវបានគេរំពឹងថានឹងស្វាគមន៍គណៈប្រតិភូមកពីជាង ៨៨ ប្រទេស និងពង្រឹងបន្ថែមទៀតនូវទំនាក់ទំនងវប្បធម៌ សេដ្ឋកិច្ច និងស្ថាប័ននានានៅទូទាំងបណ្តាប្រទេស ហ្រ្វង់កូហ្វូន (Francophone)។​

OCIC កំពុងចូលរួមចំណែកទាំងនេះដោយគាំទ្រដល់អ្នករៀបចំ ដោយព្រឹត្តិការណ៍សំខាន់ៗត្រូវបានកំណត់ឱ្យធ្វើឡើងនៅទីតាំងដែលបានអភិវឌ្ឍដោយ OCIC រួមមានកិច្ចប្រជុំកំពូលនៅមជ្ឈមណ្ឌលសន្និបាតជ្រោយចង្វារ និង FrancoTech នៅមជ្ឈមណ្ឌលសន្និបាតកោះពេជ្រ។ ការចូលរួមនេះ ឆ្លុះបញ្ចាំងពីចំណងយូរអង្វែងរបស់ក្រុមហ៊ុនជាមួយសហគមន៍អ្នកនិយាយភាសាបារាំង (Francophone) ដោយមានជនជាតិបារាំងជាង ៥០ នាក់ និងអ្នកជំនាញមកពីប្រទេស Francophone ជាច្រើនកំពុងធ្វើការនៅទូទាំងប្រព័ន្ធក្រុមហ៊ុន Canadia Group។

តាមរយៈការចូលរួមរបស់លោកស្រីជាអ្នកតំណាងក្នុងវិស័យធុរកិច្ចសម្រាប់ប្រទេសកម្ពុជា ឧកញ៉ាវេជ្ជបណ្ឌិត Pung Carolyne បន្តលើកទឹកចិត្តដល់ការសន្ទនា ការតភ្ជាប់ និងកិច្ចសហការរវាងប្រទេសកម្ពុជា និងដៃគូអន្តរជាតិ។៕

(សូមអានបន្ត)

គណៈគ្រូពេទ្យកម្ពុជា ចេញលិខិតស្រាយបំភ្លឺអំពីករណី «បាតុភាពក្នុងបណ្ដាញសង្គម លោកវេជ្ជបណ្ឌិត និត ប៊ុនតុងយី ហៅ Dr. Tong»

 

(ភ្នំពេញ)៖ គណៈគ្រូពេទ្យកម្ពុជា នៅរសៀលថ្ងៃទី០៣ ខែមិថុនា ឆ្នាំ២០២៦ បានចេញលិខិតស្រាយបំភ្លឺអំពីករណី «បាតុភាពក្នុងបណ្ដាញសង្គម លោកវេជ្ជបណ្ឌិត និត ប៊ុនតុងយី ហៅ Dr. Tong»។

យោងតាមលិខិតដែលបណ្តាញព័ត៌មាន Fresh News ទទួលបានបញ្ជាក់ថា គណៈគ្រូពេទ្យរាជធានីភ្នំពេញ និងគណៈគ្រូពេទ្យភូមិភាគ១ បានទទួលជួបលោកវេជ្ជបណ្ឌិត និត ប៊ុនតុងយី ហៅ Dr. Tong នាថ្ងៃទី២៩ ខែឧសភា ឆ្នាំ២០២៦ ក្នុងបំណងជ្រោមជ្រែង គាំទ្រ និងជួយរំលឹកអំពីកាតព្វកិច្ច របស់អ្នកប្រកបវិជ្ជាជីវៈសុខាភិបាលទាំងអស់ ឱ្យបន្តខិតខំចូលរួមចំណែកតាមគ្រប់រូបភាពចែករំលែកចំណេះដឹង អំពីការថែទាំសុខភាព សុខុមាលភាព ជូនដល់សាធារណជន ដោយត្រូវខិតខំផ្ទៀងផ្ទាត់ «ព័ត៌មានស្តីពីសុខភាព» ឈរលើមូលដ្ឋានវិទ្យាសាស្ត្រ និងវេជ្ជសាស្ត្រច្បាស់លាស់ ពិតប្រាកដ និងអាចផ្ទៀងផ្ទាត់បាន "Evidence-Based Medicine" (EBM) ដោយអ្នកជំនាញជាតិ និងអន្តរជាតិ និងអង្គការសុខភាពពិភពលោក។

ក្នុងស្មារតីការពារសុខភាព សុខុមាលភាពសាធារណជន ដែលជាអាទិភាពសុខាភិបាលខ្ពស់បំផុត និងជា បេសកកម្មទីមួយ គណៈគ្រូពេទ្យកម្ពុជា ក៏ដូចជាគណៈវិជ្ជាជីវៈសុខាភិបាលទាំងអស់ បាននិងកំពុងរៀបចំជាបន្ត បន្ទាប់វគ្គបណ្តុះបណ្តាលក្រើនរំលឹកផ្សព្វផ្សាយគ្រប់ទិដ្ឋភាព និងគ្រប់រូបភាពតាមបណ្តាខេត្តក្រុង អំពី«ក្រមសីល ធម៌វិជ្ជាជីវៈ រួមទាំងបទប្បញ្ញត្តិទាំងឡាយដែលមានជាធរមាន» ជូនដល់សមាជិក សមាជិកាដែលកំពុងប្រកបវិជ្ជាជីវៈ វិស័យសុខាភិបាល រួមទាំងជំនួបបុគ្គល ជំនួបរួមក្នុងអង្គភាពសុខាភិបាល ទាំងសាធារណៈ ទាំងឯកជន។

ទន្ទឹមនឹងនេះគណៈគ្រូពេទ្យកម្ពុជា សូមថ្លែងអំណរគុណដល់មតិសាធារណៈដែលបាន និងកំពុងចូលរួមផ្តល់ព័ត៌មាន ត្រឡប់និងខិតខំរួមគ្នាក្នុងបុព្វហេតុសុខភាព សុខុមាលភាពទាំងអស់គ្នា៕

(សូមអានបន្ត)

សម្ដេចតេជោ ហ៊ុ​ន សែន បង្ហោះរូបភាពអង្គុយលេង នៅមុខឆ្នេរសមុទ្រ ក្នុងខេត្ដព្រះសីហនុ អមនឹងខ្លឹមសារ និយាយពីការផ្លាស់ប្ដូរតួនាទី

 

សម្ដេចតេជោ ហ៊ុ​ន សែន បង្ហោះរូបភាពអង្គុយលេង នៅមុខឆ្នេរសមុទ្រ ក្នុងខេត្ដព្រះសីហនុ អមនឹងខ្លឹមសារ និយាយពីការផ្លាស់ប្ដូរតួនាទី

(ភ្នំពេញ)៖ សម្ដេចតេជោ ហ៊ុន សែន ប្រមុខរដ្ឋស្តីទី នៅរសៀលថ្ងៃទី០៥ ខែធ្នូ ឆ្នាំ២០២៥នេះ បានបង្ហោះរូបភាពប៉ុន្មានសន្លឹក ដែលសម្ដេចកំពុងតែអង្គុយលេង និងលេងទឹកសមុទ្រ ក្នុងខេត្ដព្រះសីហនុ អមនឹងខ្លឹមសារ និយាយពីការផ្លាស់ប្ដូរតួនាទី ពីនាយករដ្ឋមន្ដ្រី មកជាប្រមុខរដ្ឋស្ដីទី។

តាមរយៈ Facebook Page ផ្លូវការ របស់សម្ដេចតេជោ បានសរសេរថា «ចាប់ពីខែឧសភា ២០២៣ ដល់ខែធ្នូ ២០២៥ រយៈពេលជាង២ឆ្នាំ ទើបមកកន្លែងនេះវិញ។ រូបរាងមិនផ្លាស់ប្តូរ ច្រើនទេ តែអ្វីដែល ផ្លាស់ប្តូរ គឺពីនាយករដ្ឋមន្ត្រី មកជាប្រធានព្រឹទ្ធសភា ប្រធានឧត្តមក្រុមប្រឹក្សាផ្ទាល់ព្រះមហាក្សត្រ និងថ្ងៃនេះ បំពេញមុខងារជាប្រមុខរដ្ឋស្តីទីផងដែរ»៕

(សូមអានបន្ត)